മൊബൈൽ ഫോൺ ബിസിനസ്സ് അവസാനിപ്പിച്ച് എൽജി


ന്യൂഡൽഹി: മൊബൈൽ ഫോൺ ബിസിനസ്സ് അവസാനിപ്പിച്ച് ദക്ഷിണ കൊറിയൻ ടെക് ഭീമനായ എൽജി. സ്മാർട്ട്ഫോൺ വിപണിയിലെ ശക്തമായ കിടമത്സരം ആണ് എൽജിയെ വിപണിയിൽ നിന്നും പിൻവാങ്ങാൻ പ്രേരിപ്പിച്ചത്. ഇപ്പോൾ വിപണയിലുള്ള എൽജി സ്മാർട്ട്ഫോണുകളുടെ വിൽപന സ്റ്റോക്ക് അവസാനിക്കുന്നതുവരെ തുടരും എന്നും സർവീസ്, സോഫ്റ്റ്വെയർ സപ്പോർട്ട് തുടരും എന്നും എൽജി വ്യക്തമാക്കി.

മൊബൈൽ ഫോൺ വിപണിയിലുള്ള എൽജിയുടെ നിക്ഷേപങ്ങൾ ഇലക്ട്രിക്ക് വാഹങ്ങളുടെ ഘടകങ്ങൾ നിർമ്മിക്കുന്നതുപോലുള്ള കന്പനിയുടെ മറ്റുള്ള മേഖലകളിലേക്കായി പുനർവിന്യസിക്കും. ജൂലൈ 31−ഓടെ എൽജി മൊബൈൽ ഫോൺ ബിസിനസ്സിന്റെ പ്രവർത്തനം പൂർണമായും അവസാനിപ്പിക്കാനാണ് കന്പനി ലക്ഷ്യമിടുന്നത്. കൊറിയൻ മാധ്യമങ്ങൾ റിപ്പോർട്ട് ചെയ്യുന്നതനുസരിച്ച് എൽജിയുടെ സ്മാർട്ട്ഫോൺ വിഭാഗത്തിൽ ജോലി ചെയുന്ന 60 ശതമാനത്തോളം തൊഴിലാളികളെ കന്പനിയിൽ തന്നെ മറ്റു വിഭാഗങ്ങളിലെക്ക് പുനർനിയമനം നൽകും.

ദക്ഷിണ കൊറിയൻ ടെക് ഭീമന്മാരായ എൽജി ഇലക്ട്രോണിക്സ് സ്മാർട്ട്ഫോൺ വിപണിയിൽ നിന്നും പിൻവാങ്ങി. ഡയറക്ടർ ബോർഡ് അംഗീകരിച്ചതോടെയാണ് തിങ്കളാഴ്ച ഔദ്യോഗിക പ്രഖ്യാപനം ഉണ്ടായത്. കഴിഞ്ഞ 5 വർഷം കൊണ്ട് 4.5 ബില്യൺ ഡോളറിന്റെ (ഏകദേശം 32856 കോടി) നഷ്ടം ആണ് എൽജി റിപ്പോർട്ട് ചെയ്തത്. ഇതാണ് നഷ്ടം വരുത്തിവയ്ക്കുന്ന ബിസിനസ്സിൽ നിന്നും മാറിനിൽക്കാൻ എൽജിയെ പ്രേരിപ്പിക്കുന്നത്. 

സാംസങ് ആണ് ദക്ഷിണ കൊറിയയിൽ നിന്നും തന്നെയുള്ള എൽജിയുടെ പ്രധാന എതിരാളി. ഇതുകൂടാതെ ചൈനീസ് ബ്രാൻഡുകളായ ഷവോമി, ഒപ്പോ, വിവോ, വൺപ്ലസ് എന്നിവർ കൂടി കളത്തിലിറങ്ങിയപ്പോൾ എൽജിയുടെ അടിപതറി. എങ്കിലും വെറൈറ്റി ഫോണുകളിലൂടെ സ്മാർട്ട്ഫോൺ സെഗ്മെന്റിൽ തങ്ങളുടേതായ സ്ഥാനം നേടാൻ ഇരട്ട സ്‌ക്രീനുള്ള വെൽവെറ്റ് കഴിഞ്ഞ വർഷം എൽജി ഇന്ത്യയിൽ അവതരിപ്പിച്ചിരുന്നു. കഴിഞ്ഞ വർഷം തന്നെ നവംബറിൽ എൽജി വിങ്ങും ഇന്ത്യൻ വിപണിയിലെത്തി. ഈ വർഷം ഫെബ്രുവരിയിലാണ് മിഡ്റേഞ്ച് സ്മാർട്ട്ഫോൺ ശ്രേണിയിൽ W41,W41+, W41 പ്രോ എന്നിങ്ങനെ 3 ഫോണുകൾ എൽജി അവതരിപ്പിച്ചത്.

You might also like

Most Viewed