കൊറോണ വൈറസ്: ചൈനയില്‍ മരണം 80 ആയി: രാജ്യത്ത് മൂവായിരത്തോളം പേർ‌ക്ക് രോഗം സ്ഥിരീകരിച്ചു


ബെയ്ജിംഗ്: കൊറോണ വൈറസ് പിടിതരാതെ വ്യാപിക്കുന്നു. ചൈനയിൽ കൊറോണ വൈറസ് ബാധിച്ച് മരിച്ചവരുടെ എണ്ണം 80 ആയി. ഇതുവരെ രാജ്യത്ത് മൂവായിരത്തോളം പേർ‌ക്ക് രോഗം സ്ഥിരീകരിച്ചു. അതിനിടെ വൈറസ് വ്യാപനം തടയാന്‍ ചൈന രാജ്യത്ത് പൊതുഅവധി നീട്ടി. വൈറസിന്‍റെ പ്രഭവ കേന്ദ്രമായ ഹുബൈയിൽ തിങ്കളാഴ്ച 10 പേർ കൂടി മരണത്തിന് കീഴടങ്ങി. ഇതോടെ ഹുബൈയിൽ മരിച്ചവരുടെ എണ്ണം 76 ആയി. ചൈനയിൽ 2,744 പേർക്കാണ് വൈറസ് ബാധ സ്ഥിരീകരിച്ചിരിക്കുന്നത്. ഇതിൽ 300 പേരുടെ നില ഗുരുതരമാണ്. തായ്‌ലൻഡ്, യുഎസ്, ഓസ്ട്രേലിയ എന്നിവിടങ്ങളിലായി 41 പേർക്ക് കൂടി രോഗം സ്ഥിരീകരിച്ചിട്ടുണ്ട്. ചൈനയുടെ വെളിയിൽ ആരും കൊറോണ വൈറസ് ബാധിച്ച് മരിച്ചതായി റിപ്പോർട്ട് ചെയ്തിട്ടില്ല.

കൊറോണ വൈറസ് മൂലം രോഗബാധിതരായവര്‍ക്ക് പുറമെ ലക്ഷണങ്ങള്‍ ഒന്നുമില്ലെങ്കിലും മറ്റുള്ളവരിലേക്ക് രോഗം പടരാന്‍ സാധ്യതയുണ്ടെന്നാണ് ചൈനീസ് ആരോഗ്യമന്ത്രാലയത്തിന്‍റെ മുന്നറിയിപ്പ്. ഇതാണ് പുതിയ കൊറോണ വൈറസും പഴയ വൈറസും തമ്മിലുള്ള പ്രധാന വ്യത്യാസമെന്നും ചൈനീസ് ആരോഗ്യമന്ത്രി വ്യക്തമാക്കി. അതിനിടെ വൈറസിന്റെ വ്യാപനം തടയുന്നതിന്‍റെ ഭാഗമായി രാജ്യത്ത് വന്യജീവികളുടെ വില്‍പ്പന ചൈന നിരോധിച്ചു. ഫ്രാന്‍സും അമേരിക്കയും സംയുക്തമായി വുഹാനില്‍നിന്ന് പൗരന്‍മാരെ പ്രത്യേകവിമാനത്തില്‍ ചൊവ്വാഴ്ച മുതല്‍ നാട്ടിലേക്കെത്തിക്കും. സംസ്ഥാനത്ത് 288 പേരാണ് നിരീക്ഷണത്തിലുള്ളത്. ഏഴുപേര്‍ ആശുപത്രികളിലും ബാക്കിയുളളവര്‍ വീടുകളിലുമാണ്. ചൈനയില്‍നിന്ന് ഞായറാഴ്ച 109 പേര്‍ സംസ്ഥാനത്ത് തിരികെ എത്തിയതായി ആരോഗ്യവകുപ്പ് അറിയിച്ചു. വൈറസ് പടരുന്നത് തടയാന്‍ നെടുമ്പാശേരി വിമാനത്താവളത്തില്‍ വിപുലമായ ക്രമീകരണങ്ങള്‍ ഏര്‍പ്പെടുത്തിയിട്ടുണ്ട്.

You might also like

Most Viewed